Breiveibys jiedzīns pādejuo goda nūtykumu kontekstā ir atsagrīzs apritī ar daudz leluoku dziļumu i cytaižuoku izpratni. Sevkuram ir svareigi definiet sovys īkšejuos breiveibys rūbežys, tok myusim vysim juopīlīk rūka tam, lai breiveiba vysūs sovūs lobuo nūdūma formatūs ir kasdīnys dabiska sastuovdaļa.
Vuicūtīs latgalīšu volūdu, ar školānim raudziejom saprast, kas ir myusu breiveibys cena. I pats fakts, ka varom školā vuiceitīs latgalīšu volūdu, ir vīns nu ruodeituojim, ka breiveiba izapaust ir stypri atsateistiejusi nu laika, kod školā guoju es i latgalīšu volūdai tei nabeja draudzeiga vīta.
Itūgod myusu puordūmom beja arī platforma, kur ar jom pasadaleit – radūšūs dorbu konkurss studentim i školānim “Mana brīvības cena”, kū organizieja RSU Juridiskuo fakultāte sadarbeibā ar bīdreibu Publisko tiesību institūts, kai arī Latvijas Politologu bīdreibu i Viesturis i sociālū zineibu školuotuoju bīdreibu.
Tai kai itūgod dorbus konkursam varieja īsnīgt arī latgalīšu literarajā volūdā, izmieginuojom sovus spākus, i cīš lela prīca, ka nu 44 dorbim diveju myusu školys školānu dorbi konkursā īguva gūdalguotys vītys i breineigys bolvys – īspieju sasatikt ar vaļsts prezidentu Egilu Levitu i pasaviert, kai struodoj Eiropys parlaments Briselī.
Poši školāni par konkursu i pasuokumu soka tai:
“Itymā pasuokumā tyka apvīnots pateikamais ar lītdereigū – nūdereiga informaceja i bolvys. Pasuokuma suokumā beja dūts vuords kotram žūrejas dalinīkam, kas beja īsarods iz pasuokumu kluotīnī. Tyka akcenteita i atkuortuota informaceja par Latvejys Satversmes sasaukšonys dīnu.
Apvīnojūt visu žūrejas lūcekļu saceitū, atzeimejamī datumi ir myusu dzeivis pauzis. Svareigi pīsadaleit jebkaida veida konkursūs, i golvanais nazakautriet izsaceit sovys dūmys!”
Mairis Ladusāns
