Kū breiveiba nūzeimej maņ kai pylsūņam? Kaidu cenu es moksoju, lai dzeivuotu demokratiskā vaļstī? Ite vīni nu daudzajim, bet na mozuok svareigajim vaicojumim,kuru aizdūšona sev pošam ir svareiga, lai turpynuotu pastuoviet taida Latveja, par kuru ceiniejuos myusu pyrmteči.
Latvejis vaļsts esam mes – vaļstsīvas i vaļstsveiri, kuru atbiļdeibā ir nūsorguot vaļsts i sabīdreibys turpmuokū pastuoviešonu Rītumeiropys breivuos pasaulis saimī. Pylsūniskuo atbiļdeiba ir cīši trausla līta, kuras atteisteišona ir napīcīšama kūpš suokumškolys godim, tymā ītvarūt gon formalū, gon naformalū izgleiteibu.
Munā uzskotā Publisko tīseibu instituta reikuoutais rokstu dorbu konkurss “Muna breiveibys cena” ir loba naformaluos izgleiteibys ceļā snīgta īspieja atteisteit pylsūniskuos atbiļdeibys kompetenci, līkūt aizadūmuot par tū, kaidu cenu moksojam mes, pylsūņi, lai baudeitu breivuos vaļsts vierteibys. Lai sorguotu poši sovys i vaļsts breiveibu (kas nav atdoloma), aktīvi juoaizstuov tuos ideali na tikai suovūs vuordūs, bet arī reiceibā. Myusu pyrmsteči tū ir pīruodiejuši naatkareibas karā i Atmūdys laikūs.
Pasasokūt pīsadaleišonai konkursā, asmu nūformuliejs konkretuok breiveibys cenu: jei nikod nav par breivu. Naatkareigi nu myusu pošu ambicejom i interesem, Latvejis vaļsts īdzeivuotuojs nadreikst byut atsvešynuots nu vaļsts puorvaļdis i īspiejas tymā dūt ieguļdiejumu breiveibys pastuoviešonā, pīvadumam, bolsojūt par partejom ar skaidri definātom vierteibom,kurys naīt pret myusu tautas brieveibys idealim.
Linards Munda
